Eg har ete byen
Eg har gnaga i meg
alle vindaugo
som brann hol i natta
Slukt sirenene som
gret i Kirkeveien
Eg har fortært bakgatene
ei etter ei
og ete bilar
med gapet
til ei ferje
Men ein ting
gjorde eg feil
Eg åt Schweigaardsgate
Eg har tygga i meg
parkar
der folk sov på aviser
og bruer våte av morgonregn
Eg har konsumert
heile bydelar med butikkar
lager og containerar
Eg har sett sporvogner
koma og gå
i det gulgråe lyset
av februarkveldar
Bare ein ting gjorde eg galt
Eg åt Schweigaardsgate
Eg har maula i meg murar
asfalterte plassar
og gomla glupsk på gardsplassar og glava
Eg sette til livs parkeringsplassar
blomebed og fotgjengerfelt
Svære uferdige bygningar
eg ikkje viste kva skulle verta
har eg slukt med stilas og presseningar
Men ein stor tabbe har eg gjort
Eg åt Schweigaardsgate
Holsvolten bytta eg andlet
med plakatar
på plankegjerda
Eg stod sugen i kø
framfor tunge dører av natt
medan sommarkledde
forventningar ropte og skreik
i gatene
Eg dreiv grådig gjennom
varme netter
når gatelysa drakk håret
til sminka ungjenter
som om det var regn
Bare ein ting gjorde eg
riv ruskande gale
Eg åt Schweigaardsgate
Eg fråtsa i søppel
eg har fått meir enn min del
av vrakgods og smadra togvogner
I denne gule byen
har eg sett kvart
morgongråe måkebomba tak
Eg er mett
Oppfylt av verda
Eg har ete tiggarar og boms
og spytta dei ut att
Eg hallusinerte
og vart gal
Men bare ein ting
gjekk heilt på tryne
Eg åt Schweigaardsgate
Eg har slukt stemmen
til kompressborar
og gatemusikantar
Eg har ete duer
knuste kassar og kartongar
Eg prøvde
heile tida
å eta meg ut herifrå
Det klarte eg ikkje
før eg endeleg
hadde fortært og fordøyd
Schweigaardsgate